A sa valorosa Brigada “Tataresa”
(Rimas sinceras di Bachisio Asili)
De s’umile Sardigna onore e vantu,
Salve! Brigada “Tatari”, famosa!
Tue has aggiuntu a su celeste mantu
De custa Italia nostra gloriosa
Un’istella chi format dulche incantu
In sos coros umanos de su mundu.
Tue sa prus fidele ogni mamentu
Ses bistada in sa gherra e cun profundu
Indomabile islanciu e ardimentu
Has cun firmesa istruncadu de fundu
De feroces nemigos su turmentu,
Provas dende costantes de valore.
Cantas paginas vivas has iscrittu,
Has iscolpidu, forte a su dolore
De bier frade sardu in terra frittu
In su sagradu campu de s’onore.
Su samben preziosu, beneittu
De frades nostros chi a chentos ruiant
De Tàtari lontanu e de Kalàris,
Daiat prus prontesa; s’intendiant
Totus unidos nende: Forza Paris!
Áteros milli sa vida perdiant
Gherrende in s’aspru monte e in su paris,
Ma milli áteros frades fint già prontos
E leadu su postu de sos ruttos
Cun prus ardore assigurant sos contos
Cun sos nemigos lassende distruttos
Sos canes de istelzu, fottos tontos
Dae cuddos chi gherrant cantende muttos,
Tributende a sa Patria onore e vida.
Cantos Brigada “Tatari” nd’has dadu
In olocaustu a sa «Virgo opprimida»
Dae s’Urzu, chi nos hiat usurpadu
Tantas perlas, forméndenos ferida
Dolorosa in su coro angustiadu.
In «Bosco del Cappuccio» su battismu
De su fogu, Brigada prodigiosa,
Tue tenzesti e fulgidu eroismu
Has dimustradu in s’ora dubbiosa
Cando in sos primos passos s’ostracismu
Pariat chi sa sorte capricciosa
Haeret riservadu a coros sardos!
Riflettesti un’istante e a gherrare
Intras de nou inchende sos codardos
Occultados in «Bosco triangolare»!
Brigada de mirabile azzardos
Sa fama consighida hat a durare
Eterna cantu durant sole e luna!
Tantas boltas disfatta e rinnovada
Mai t’hat avvilidu disfortuna,
Manc’una olta a segus ses torrada!
Tempus malu, a disora, a sa giaúna
E morte chi fit sempere impostada
No t’hant dadu turmentu né pelea
Pro difender s’onore italianu !
L’affirmat delle «Frasche» sa trincea;
S’átera dei «Razzi» no est vanu
Si l’ammento oe, ca cun firma idea
L’has attaccada e tenta forte in manu.
Gherras e binches! S’antigu valore
De sa sarda progenie manifestas
Peri sas roccas de «Monte Fiore».
In «Castello Gomberto» ancora attestas
Chi sa Patria si servit cun onore
E no fattende ribottas e festas.
E prosighis sa marcia gloriosa
Lassende in «Monte Zebio» provas claras,
Superbas chi ses forte e valorosa,
Ch’infinitas possedis dodas raras.
Cun mente calma, attenta, rigorosa,
Mentras cumbattis penzas e preparas
Su de fagher ancora a tappa, tappa,
Pro bincher e distruer s’avversariu
Boghéndeli de corpus coro e nappa.
Pagu t’importat si bentu contrariu
T’est turmentosu in s’«Azione Kappa»:
Tue recitas totu su Rosariu
De su dovere finzas a sa morte
Dende a s’usurpadore in dogni logu
Esempiu de corazu si sa sorte
No t’est amiga cando attaccas fogu.
No balet no ch’in cust’ora riporte
Puntu pro puntu totu su forrogu
Chi has postu a sos nemigos in s’Hermada;
Dae su «Monte Pórtula» movende
Finza a sa «Bainsizza» conchistada!
Cantos canes morzesint orulende
Cando tue lis desti s’attaccada
Armoniosos cantigos cantende!
Cant’eroismu! Cumprendo e rispetto
Su dolore amarissimu, o Brigada,
Chi has suffertu lassende a «Caporetto»
Avvolottadu … contra a … Farinata!
Ma restas forte e in «Cima Cischietto»
Cun sa mitraglia bona serenata
Faghes a s’ascia mala de s’inferru
Chi s’onore de domo est calpestende!
Coro no faltat; no ti mancat ferru:
Armas noas sa Patria est preparende
Pro ti las dare in su penosu jerru
Chi a passos mannos s’est accurziende,
Figadu unfrende, a Malintragna e fele!
Armas e voluntade enint formadas!
S’anima est pronta; su coro est crudele
C’hat de chittire sas penas passadas.
Assaltas «Col del Rosso» e «Col d’Echele»
E ti nde torras a impadronire
Dende a barbara istirpe colpu grave.
S’ora est sa nostra; non pódet fallire;
Torra in Cumandu tenimos sa nave.
Avanti cun Savoia! a distruire
Sos de s’átera ispunda ‘e su «Piave»!
Cale impetu sublime, leggendariu,
Tue Brigada “Tatari” rivelas
Bortulende su perfidu avversariu,
Chi haiat piantadu sas bandelas
In domo nostra, in su nostru sacrariu,
Ricaméndebi supra amaras telas!
Ma tue iscudes colpos de Titanu
Li pones fattu no li dás respiru
Finza a lu bier respintu lontanu
Finza a chi no lu pones fora ‘e tiru.
Su mazu tou no falat invanu
Ma dát morte funesta in largu giru!
Feris e iscunvolgis cun lestresa
Cantu s’arreschet in s’opposta riva.
Su coro est firmu, chena debilesa;
S’ora est sicura; est de timore priva.
Cun impetu riforzas sa difesa
E t’approntas a s’ultima offensiva.
Imponente est s’isforzu onzi momentu;
Ma no t’istraccas; totus sos poderes
Usas pro istruncare su turmentu
Chi dát su bier sutta áteros meres
Sacras terras chi bagnant Tagliamentu.
Cumandamentos cumplis e doveres;
Nudda trascuras pro tenner siguru
De su duellu ‘e morte su finale.
Nudda de cantu faghes t’enit duru,
Portes bombas, o piccos, o bistrale :
S’amore pro s’Italia est vivu e puru
E t’hat a dare fama universale!
Sas armas affiladas sunt a fine;
Milli coros nde formant unu solu:
Totu supportas: bentu, alga, proine,
Sole, nie, molestu tremizolu :
Tue isettende ses, Santu Aine:
Chi t’hat a dare confortu e consolu !
«Viva l’Italia»! Cominzat s’attaccu!
«Savoia! Viva il Re»! Gridant sos fantes.
«Savoia! Pattriottismu … fele e …zaccu
Redent totus sos coros delirantes!
Morte a Culierme! Morte a Betzu Ciaccu!
Sun de sos fantes sos gridos costantes!
Vivat Brigada “Tatari” rintronat;
«Forza Paris»! sa Patria a liberare.
Candu su Sardu assaltat non perdonat.
«Forza Paris»! sos lupos a mazare;
Su Sardu in gherra: cantat, bocchit, sonat.
E cantende e morzende a conca a pare
Sos Sardos s’avversariu costringhent
A perder armas, homines, logos.
Donzi minutu a segus lu respinghent;
Donzi istante pius graves sunt sos jogos;
Sos Sardos cando addobbant mai linghent,
No si perdent in falzos disaogos!
Su «Piave a Salettuol» milla ripassas;
Leas «Santa Lucia, Granza e Sorano»
A su nemigu respiru non lassas
E lu magheddas in «Conegliano»,
Istrunchéndeli isprene e malas trassas
In «Montanér, Canéva e Avïano»!
Sos lupos sunt currende a tota fua
Ma benint casi totus ismurrados
E donzi muzzighile oddit sa sua!
Non parent issos! Tantu sunt prostrados
Attontados che pische fertu a lua,
Che canes cun lestresa … iscozonados!
Su «Grappa» est torra nostru ei sa novella
S’hat chi liberas sunt «Trento e Trieste»,
Sas predilettas de s’Italia bella,
Torradas sutta su mantu celeste,
Sutta sa Cappa de sa Bona Istella.
A fine su turmentu bénnidu este
Pro «Mater Dolorosa», un annu in luttu.
S’esercitu tedescu fertu a morte
In «Vittorio Véneto» est distruttu!
Tua Brigada “Tatari” sa sorte
Tenes de render maduru su fruttu
Costadu vidas, piantu e dolore.
Pro Te, pro Te, «Magnifica Vittoria»
Lograt sa Patria nostra e altu onore.
Tue fattos immortales in s’Istoria
Has cunsagradu de Sardu Valore;
Pro Te s’Italia s’est «cinta de gloria».
Viva Brigada “Tatari” sa digna
De sas dignas, ricchissimu tesoro
De sa Patria; sa sorte hapant benigna
Cantos t’hana plasmadu mente e coro:
Eterna duras, Perla de Sardigna,
Cun sas bandélas carrigas de oro.
Presentazione de Su Calendariu 2009.
Altre immagini de Su Calendariu.
