Ogni ultimo martedì del mese, Atobiu – incontri in “Limba” – “Mannigos de memoria” – prossimo appuntamento martedì 31 maggio, ore 21 a Su Nuraghe – via Galileo Galilei, 11 a Biella.
Imparai s’arti de su mulciu, s’arti de s’intrecciu de sa prama, de s’antigoriu a oi, fueddendi su sardu tottus in pari.
Fairi praxeri a biri ca oi seusu meras, aressi ca s’arribu de su beranu ingainara de prusu a bessiri de domu, de chi nou,eusu incertau a acciungi sa dimostratzioni de s’intrecciu a s’arrexionara in limba. Gavinu Pecorini, chi fairi de maistu, s’est fattu carrigu de procurai sa fola de prama nana po su mulciu, e sa fola frisca po fai intreccius de portai a benedixi sa di de is pramas.
Su professori Battista Saiu spiegara ca sa prama est una matta originaria de su Nord Africa, est sa primu matta chi s’omini ari cumentzau a coltivai po si procurai alimentu; sacra fintzas de s’antigoriu tenniri meras signus, bennera accostara a sa fertilirari de s’omini, de is animalis, de sa terra, de su chelu e de su soi; considerara unu signu de vittoria, de rigeneratzioni e de immortalirari, su fruttu de sa prama, is datterus, si papanta sa die de sa festa. Cun su Cristianesimu si funti appompiaras is traditzionis e i signus antigus de su paganesimu adattendidus a sa religioni cristiana.
Gavinu, distribuisciri i matzittedus de fola, e fairi a biri a is chi no funti bonus comenti si fairi; calincunu est giai bonu e si ponniri a fai is intreccius de portai a benedixi. Bisungiara a riconosci ca appassionara a tottus, cussus chi anti scioberau sa prama siccara, fainti su mulciu, corrias de prama, poi ponendi impari prus corrias bessiri una funi, po fai sa funi grussa si depinti praciri is folas a stiscias finisi; cun su mulciu, una borta si fenta is ordinagus, po is bois e is cuaddus, certu imou ci funti atrus materialis.
Is arrexionamentus funti meras, calincunu arregordara tottus is erbas e i germoglius de is mattas chi si usanta una borta, po intrecciai e po manixiai in is traballus, sa stoia, su sessini, su giuncu, sa murta, s’ollastu, sa modditzi, sa canna, serbenta po accappiai e po fai strexius chi funta sa mobilia de cussus tempus de is pobirus.
Sa serara c’est passara cun praxeri e cun prexu, meras si funti arranguaus e anti fattu sa proposta de continuai custas letzionis, mancai dopu Pasca, Gavinu arrigoliri su materiali avantzau e si ponniri a dispositzioni.
Bolu ringratziai nomenendi tottus is chi anti partecipau comencendi de su presidenti Battista Saiu, Gavinu Pecorini, Antonellu Siddi, Gianni Lai, Antoni Diana, Bustiana Nurra, Luciana Ecca, Caterina Orrù, Zelinu Puxeddu, Mauriziu Cannas cun sa mulei, Federica PIlloni e Jago Canu.
No ha potziu essi presenti custa borta, su bibliotecariu de su circulu, Biagiu Picciau chi perou ari boffiu donai su contributu suu mandendi scrittu su chi era essi nau a boxi; chistionara de is allomingius chi si usanta una borta, is subranominis chi serbenta po sciri de chini fusta chistionendi mellus de su nomini e cognomi. Est una bella presentatzioni chi cunsilu de liggi.
Saluri a tottus
Pieru Pinna
